Back

በኢትዮጵያ የውሃ ሥራዎች ስታንዳርድ ኮድ ሊዘጋጅ እንደሆነ ተገለጸ::

water worksየኢትዮጵያ ውሃ ሥራዎች ስታንዳርድ( የጥራት ደረጃ)  ኮድ ሊዘጋጅ እንደሆነ የአዳማ ሳይንስና ቴክኖሎጂ ዩኒቨርስቲ በደብረ ዳሞ ሆቴል ባዘጋጀው የፓናል ውይይት ላይ ተገለጸ፡፡  
ሐምሌ 23 /2010 እና 24 /2010 ዓ.ም  ድረስ የሚቆየውን የፓናል ውይይት በንግግር የከፈቱት በውሃ መስኖና ኤሌክትሪክ ሚኒስቴር የመጠጥ ውሃና ሳኒቴሽን ዘርፍ ሚኒስትር  ዴኤታ ዶ/ር ነጋሽ ዋጌሾ በሀገራችን እስካሁን ድረስ የውሃ ሥራዎች ስታንዳርድ ኮድ ባለመኖሩ ከውሃ ሥራ ኮንስራክሽን ጋር በተያያዘ  የግንባታ ጥራት ችግሮች፣ የተራዘሙ የግንባታ ጊዜያት ፣ ያልተሟሉ የጥናት ዶክሜንቶች መቅረብ፣ ከፕሮጀክት ኮንትራት አሰጣጥና አስተዳደር ጋር የተያያዙ ችግሮች ብዙ ጊዜ እንደሚነሱ ገልጸው የኢትዮጵያ ውሃ ስራዎች ስታንዳርድ ኮድ መዘጋጀት በዘርፉ የሚነሱ ጥያቄዎችን ለመመለስ ያስችላል ብለዋል፡፡ 
የአዳማ ሳይንስና ቴክኖሎጂ ዩኒቨርሲቲ የጥናትና ቴክኖሎጂ ሽግግር ምክትል ፕሮዘዳንት ዶክተር ሽፈራው ፈይሳ የውሃ ሥራዎች ስታንዳርድ ኮድ  በሀገራችን ባለሞኖሩ በዘርፉ ብዙ ችግሮች እንደሚታዩ ጠቁመው ስታንዳርዱ ተዘጋጅቶ ሲጠናቀቅ በሁሉም የሀገራችን ክፍል ወጥና የጥራት ደረጃቸውም ከፍ ያሉ የውሃ ሥራዎች ተግባራዊ እንዲሆኑ ያግዛል ብለዋል፡፡ አያይዘውም የፓናል ውይይቱም ዓላማ በውሃ ሥራዎች ዘርፍ ከተሰማሩ ባለድርሻ አካላት የሚገኘውን ሀሳብ እንደ ግብዓት ለመውሰድና ተስማሚ የውሃ ሥራዎች ስታንዳርድ  ኮድ ለማዘጋጅት እንደሆነ አመልክተዋል፡፡ 
በፓናል ውይይቱ ላይ በውሃ ሥራዎች ላይ የተሰማሩ ተቋራጮች፣ አማካሪዎች፣ ከክልል የተወከሉ ባለሙያዎች፣ ከሚመለከታቸው ሚኒስቴር መሥሪያ ቤት የተውጣጡ ግለሰቦች  ይሳተፉበታል፡፡ የፓናል ውይይት በአንድ ቀን ተኩል ቆይታው በኢትዮጵያ ውሃ ሥራዎች ተመክሮና ተግዳሮቶች፣ የዓለም ውሃ ስራዎች ተሞክሮዎችና በተያይዥ ጉዳዮች ላይ ይመክራል፡፡