Back

የታላቁ ሕዳሴ ግድብ የተጀመረበት 9ኛ ዓመት በዓልን ምክንያት በማድረግ በሕዳሴው ግድብ ዙርያ የፓናል ውይይት ተካሄደ

የታላቁ ሕዳሴ ግድብ የተጀመረበት 9ኛ ዓመት በዓልን ምክንያት በማድረግ በሕዳሴው ግድብ ዙርያ የፓናል ውይይት ተካሄደ

አዲስ አበባ፤ መጋቢት 24 ቀን 2012 ዓ.ም፤ የታላቁ ሕዳሴ ግድብ የተጀመረበት 9ኛ ዓመት በዓልን ምክንያት በማድረግ በሕዳሴው ግድብ ዙርያ በውሃ፣መስኖና ኢነርጂ ሚኒስቴር የመሠብሰቢያ አዳራሽ የፓናል ውይይት ተካሄደ፡፡ የፓናል ውይይቱ  ላይ የተሳተፉት የውሃ ፣መስኖና ኢነርጂ ሚኒስትሩ ዶ/ር ኢ/ር ስለሺ በቀለ፣የኢትዮጵያ ኤሌክትሪክ ኃይል ዋና ሥራ አስፈጻሚ ኢ/ር አሸብር ባልቻ ፣ የታላቁ ሕዳሴ ግድብ ሕዝባዊ ተሳትፎ አስተባባሪ ምክር ቤት ጽ/ቤት ዋና ዳይሬክተር ወ/ሮ ሮማን ገ/ሥላሴ እና የታላቁ የኢትዮጵያ ሕዳሴ ግድብ ዋና ሥራ አስኪያጅ ኢ/ር ክፍሌ ሆሩ  ናቸው፡፡

ኢ/ር ክፍሌ ሆሩ የታላቁ ኢትዮጵያ ሕዳሴ ግድብ በአሁኑ ወቅት የሲቪል ሥራው 86.6 በመቶ፣ የኤሌክትሮ መካኒካል ሥራው 44 በመቶ እና የብረታ ብረት ሥራው 20 በመቶ አጠቃላይ የግንባታው ሂደት 72.4 በመቶ መድረሱን ገልጸው ከኮሮና ቫይረስ (ኮቪድ 19 ) ጋር በተያያዘ ፕሮጀክቱ ችግር እንዳይገጥመው ሠራተኞች በቂ ርቀት ጠብቀው እንዲሠሩ እየተደረገ፤ለመከላከል የሚያስችሉ ግብዓቶችም እየቀረቡላቸው እንደሆነ ተናግረዋል፡፡

ኢ/ር አሸብር ባልቻ በበኩላቻዉ ግድቡ አቅም ያላቸው የውጭ ኩባንያዎች በግንባታው ሂደት እንዲሳተፉ ውል ተገብቶ ቀደም ብሎ የጥራት ችግር የነበረባቸውን ሥራዎች በማሻሻልና አዳዲስ ሥራዎችንም በጥራት በማከናወን ላይ እንደሚገኙ ተናግረዋል፡፡  በመጪው ክረምት ወቅትም ውሃ ለመያዝ እየተሠራ መሆኑን ጠቁመዋል፡፡በመጪው ክረምት ወቅት ውሃ አለመያዝ የኃይል ማመንጪያ ጊዜውን እንደሚያራዝመው የገለጹት ኢንጂነሩ በዚህ ምክንያት ሀገሪቱን አንድ ቢሊየን ዩሮ የሚጠጋ ገንዘብ እንደሚያሳጣት በተጨማሪም ለሌላ ተጨማሪ የካሣ ክፍያ እንደሚዳርጋት ተናግረዋል፡፡በመሆኑም ውሃ ለመያዝ በትጋት እየተሠራ መሆኑን አመልክተዋል፡፡

ወ/ሮ ሮማን ገብረ ሥላሴ የሕዝቡን ተሳትፎ በሚመለከት በሀገር ውስጥም በውጭም ያለው የሕብረተሰብ ክፍል አሁንም ድጋፍ እያደረገ መሆኑን ገልጸው በ2012 ዓ.ም ባለፉት 8 ወራት ብቻ 405.9 ሚሊዮን ብር በቦንድ ሽያጭና በስጦታ መሰብሰቡን ከዚህም ውስጥ 17 ሚሊዮን በውጭ ከሚኖሩ ኢትዮጵያውያንና ትውልደ ኢትዮጵያውያን የተገኘ መሆኑን ገልጸዋል፡፡

የውሃ መስኖና ኢነርጂ ሚኒስትሩ ዶ/ር ኢ/ር ስለሺ በቀለ በተለይ ከታችኞቹ ተፋሰስ ሀገራት ጋር በተያያዘ የነበረውን የድርድር ሂደት በሰፊው የገለጹ ሲሆን ሀገሪቱ ሁኔታዎችን ባገናዘበ መልኩ መተባበር ያለበት ፍትሃዊና ምክንያታዊ ተጠቃሚነት መርህ ላይ የተመሠረት ድርድር ስታደርግ መቆየቷን ገልጸዋል፡፡ በመጪው ሐምሌ ወርም ውሃ ለመያዝ እየተሠራ መሆኑን ጠቁመዋል፡፡

ሕብረተሰቡም መንግሥት የሚሰጠውን መመሪያ በመተግበር ራሱን ከኮሮና ቫይረስ (ኮቪዲ 19) እንዲጠብቅ መልእክት ተላልፎ የፓናል ውይይቱ ተጠናቋል፡፡

የፓናል ውይይቱ ፓናሊስቱና ጋዜጠኞች ብቻ በተገኙበት የተካሄደ ሲሆን በመገናኛ ብዙኀን አማካኝት ለህብረተሰቡ እንደሚቀርብ ይጠበቃል፡፡


News Archive News Archive